24 տարի դատավոր աշխատած Սուրեն Անտոնյանի լիազորությունները ԲԴԽ-ն դադարեցրեց․ պատճառը մոտ 16 տարի առաջ կայացրած վճիռն է
Բարձրագույն դատական խորհուրդը հ րապարակեց Վճռաբեկ դատարանի դատավոր Սուրեն Անտոնյանին կարգապահական պատասխանատվության ենթարկելու մասին Արդարադատության նախարար Գրիգոր Մինասյանի միջնորդությունների վերաբերյալ որոշումը։ ԲԴԽ-ն դադարեցրեց Անտոնյանի լիազորությունները։
«Խորհուրդը հարկ է համարում պարզաբանել, որ որոշման կայացման համար հիմք է հանդիսացել ՄԻԵԴ-ի որոշումը, որով արձանագրվել են իրավական որոշակիության, դատական ակտերի վերջնական լինելու սկզբունքների, ինչպես նաև քաղաքացու հիմնարար իրավունքների խախտումները»,-նշեց ԲԴԽ նախագահը։
Դատավոր Սուրեն Անտոնյանի նկատմամբ կարգապահական վարույթը հարուցվել է «Ամիրխանյանն ընդդեմ Հայաստանի» գործով 2015թ կայացված ՄԻԵԴ վճռի հիման վրա, ըստ որի, Վճռաբեկ դատարանը, վարույթ ընդունելով երկրորդ անգամ ներկայացված բողոքը, խախտել է «res judicata» (կրկին վերանայման ենթակա չլինելու) սկզբունքը։ Այդ դատական ակտը Սուրեն Անտոնյանը կայացրել էր 2007 թվականին։
Նշենք, որ Անտոնյանը 1999-2004 թթ. նշանակվել էր ՀՀ քաղաքացիական գործերով վերաքննիչ դատարանի դատավոր։ 2004-2008 թթ.՝ ՀՀ վճռաբեկ դատարանի քաղաքացիական պալատի դատավոր։
2008-2009 թթ.՝ Հյուսիսային քաղաքացիական դատարանի նախագահ։
ՀՀ Նախագահի 2009 թվականի հունվարի 15-ի հրամանագրով նշանակվել էր Հայաստանի Հանրապետության վճռաբեկ դատարանի քաղաքացիական և վարչական պալատի դատավոր։